عاوزه اقول بس حاجه كده ب الصلاة على النبى قبل اى كلمه بس انه لو حد شايف الكلام ده وبيقراه عاوزه بس المح على حاجه انك متنساش انك بتشوف كلامى ده بفضل الجهاز ال ف ايدك بقا ايا كان وان ال عملو الجهاز ده كفره !!!
ممكن يكونو يهود او بوذيين او ملحدين حتى ... واكيد انتا عارف كده
سواء اكان العربيه ال بتركبها ولا الموبيل ال ف جيبك ولا التلفزيون ال بيسليك ولا حتى غساله بتكو
يبقى معناه كده ان الكفره دول مش وحشيين .. ولا اييه !!!
يبقا مش نكره اى حد لمجرد بس انه مختلف معانا سواء اكان فى الرأى او الفكر او العرق او الجنس لان ده فى حد ذاته تخلف عقلى وقصور فى الخلايا الدماغيه عند الانسان ال بيفكر كده وبستغرب اووى انه فى ناس كتير بتتبنا ده ب اسم الدين !!
وده مش حاجه غريبه علينا هقولكم حاجه
فى وقت كده من الاوقات ويوم من ذات اليومات شبه اختفى الاسلام من على شبه الجزيره العربيه
واتملت كفر وفسق وبقو ماشيين غلط خااالص
قام جه واحد صالح اسمه الشيخ "محمد بن عبد الوهاب"
محمد عبد الوهاب ده بقا هو شبه رجع الاسلام تانى لشبه الجزيره العربيه
طبعا بقا الناس قامو اييه لما صدقو يلاقو حد عارف فى الدين يعنى وكده المهم بقا ال عاوزه اوصله ان الناس بقت تمشى ورا محمد عبدالوهاب ده
_مع حفظ الالقاب طبعا انا عمرى مهما عملت ماهوصل ل ربع العمله_
المهم بقا ان الناس زى ماتقول كده نسيت الرسول الكريم عليه افضل الصلاه واتم التسليم وبقا اى حاجه يقولها الشيخ تبقى سمع وطاعه وناس كتييير اووى مشيت على نهجه
زى الناس مثلا ال فى السعوديه والسلفيين الى فى مصر ..
.. بما انى والحمدلله درست فى مكه اعداى وثنوى ف درست كتب الشيخ محمد بن عبد الوهاب للتوحيد
صراحه فى البدايه كان عادى لقيت انه فى حجات كتييره اووى بنعملها فى مصر غلط معظمها كانت ف الباب التالت تقريبا من الكتاب
ابتدت مشكلتى بقا لما دخلنا فى قاعده "الولاء والبراء" وبما انى بقا مصريه وعندى اصحاب فى مصر مش مسلمين ..
فا كنت زى الحاجه الغريبه كده ف المكان ..
القاعده دى بقا بتنص على انه لازم تكره بقلبك كل من يخالف هدى النبى صلى الله عليه وسلم
بس مش تأذيه طبعا ..
بس لازم تكرهه ب قلبك وتحب كل المؤمنين
الحقيقه انا مش فاكره النص ال كان بيبقى مكتوب فى الكتاب بالظبط لانه كان الكلام ده من ايام اعداى وكنت صراحه حسه انه انا كده مش مظبوطه وانى نقصه الايمان وسعات احس انى مشركه واحيانا بطلع بكفر اصغر ..
المهم يعنى جالى العقده بسبب الكام سنه دول لانى كنت حاسه انه "هو فى ايه !!"
بس لما وصلت للثنوى ولقيت ف برضو فى كتاب دين بتاع "الثقافه الاسلاميه"مكتوب "كارل مركس" هو مؤسس الشيوعيه تقريبا وانه يهودى وطبعا مشروح ايه هى الشيوعيه والعلمانيه وبقيت المذاهب .. هى كفر هى الحاد تقوم على معرفش ايه وبيعملو ابصر ايه......
انا قريت قبل كده عن كارل .. ف المفروض انه مش يتذكر فى كتاب بس انه يهودى ولا كافر وبس طب ليه متقوليش هو عمل ايه وازاى كان عايش ومؤلفاته بتتكلم عن فكره ايه وايه التغيير ال عمله حواليه وبعد كده انا بقا هحكم عليه اذا كان هو كافر ووحش ولا ساعتها مش هيهمنى اذا كان كافر ولا مؤمن لان دى حاجه بينه وبين ال خلقه ..
فلاحظت انهم هنا مخصوص فى السعوديه بيحاولو بكل الطرق يقتلو العقل والتفكير وبيسلكو نهج التكفير لكل ال مش مسلم على حد كبير او مش بيكفرو بينفرو من كل ماهو غريب عنهم وبيتكلموا ب لهجه شديده الحده عن اى حد مخالف للرأى
ولما مره بتكلم مع المدرسه وكانت بتتناقش مع واحد صحبتى اسمها ندى وبتحاول تقنعها بحاجه انا فى البدايه مكنتش عارفه هما بيتكلم على ايه بس لما لقتها بتقول لصحبتى انتى مش ضامنه تموتى امته وتخيلى لو موتى على ذنب زى ده وكلام ذى كده
انا اتخضيت فكرت انه فى حاجه قومت وقفت جنبهم شويه لقيت ان كل المشكله ان ندى مش بتغطى وشها وهى مع بباها فى العربيه مثلا ولا وهما خارجين عيله مع بعض:| طبعا انصدمت يعنى كـــــــــــــل ده عشان البنت مش بتغطى وشها !!
قولت للابله بس ده مش ذنب عظييييم اوى كده يعنى ده فى مذاهب اجازو عادى كشف الوجه والكفين لقتها بتشاورلى ب اديها وبتقولى مش انتى مصريه !! انتى على مذهب الشافعيه مش زينا ...
ساعتها انصدمت من تصرفها معايا ورجعت تانى تكمل الكلام عادى مع ندى
وده الطبيعى يعنى من ال انا شفته هنا فى الدين ..
حتى فكره ان فى مذاهب 4 مش بيتقبلوها
فا منتفاجئش بقا لما نلاقى السلفيين بيقتلو الشيعه
لانه الى حد كبيييير اوى متوهمين انه ده هو الصح وده هو المفروض يكون
مع اتفاقى او اختلافى مع الشعيين دى حاجه تخصنى مش شغل حد بس ال انا مؤمنه بيه
ربنا سبحانه وتعالى خلق الانسان ده .. مين انتا يا"عبد" عشان تحكم عليه ب الموت!!
ده احنا فى الاول والاخر عبيد ولا نسوا هو ال يخلق وهو ال ياخد الروح بأذنه وبأمره وهو ال يحاسب مش انتا ياعبد ...
انتا مهما كنت مش هتوصل لدرجه الصحابه مثلا
ده الرسول نفسه قال عنه ربنا فى القران "عبد"الله ورسوله !!
شفت ازاى بقا انتا متسواش حاجه ..
وان ربنا مش مستنى منك انك تحاسب حد فى الدنيا ..!!
ولا طالب منك انك تمشى تقتل فى خلق الله عشان تتقرب منه
ال بيعتدى عليك اعتدى زى مابيتعدى عليك ال عاوز يقتلك اقتله ال جى يحتل ارضك وانتا بتدافع عن ارضك او عرضك او مالك فى الحلات دى بس ال بيتسمى جهاد ..
احنا منضحكش على نفسنا ونسوق الاستهبال
عمروا ماكان ولا هيكون ال انتو بتعملو ده جهاد !!
ده اسمو "ارهاب"
الهوا يلا بينا كده نجرب نعمل حرب كده وكده واهو لو موتنا نبقا شهدا
زى كده لما كنا بلعب واحنا صغيرين واحد ظابط والتانى الحرامى وكنا سعات بنتقمص الشخصيه اوى وبنضرب ونتضرب اهم بقا عاملين زى كده بالظبط
ربنا سبحانه وتعالى قال "وجعلناكم شعوبا وقبائل لتعارفوا ان اكرمكم عن الله اتقاكم"
يبقا الميزان هنا ايه فى الشعوب والقبائل والاختلاف بين اطياف الناس
المزان هو التقوى مش القوه ولا مين معاه كام ولا مين بيعمل ايه ولا مين بيفكر ازاى
بس للاسف الناس هتفضل كده زى ماهى لقيام الساعه والظلم هيفضل فى الارض لقيام الساعه والتلزق ب الدين والغباوه والاتضهاد فى كل حاجه فيضل قائم
مش من العدل انك تحكم على الناس او تحاكم فى الناس بغير وجه حق
ولا من العدل انك تحجر عليا فكرى او رأئى بحجه ان ده حرام او ده مش مسلم يبقا ده فى النار يبقى ملناش دعوه بيه ..
بدل مانشغل نفسنا اننا نحاول حتى معاهم نشرحلهم دينا او نقولهم اى حاجه عنه بقينا بنشغل نفسنا بالقضاء عليهم
كل واحد فى الدنيا دى حاسس انه هو الصح سواء كان مسلم مسيحى بوذى حتى ال بيعد النار وال بيعبد الجموسه بيبقى يقين جواه انه هو الصح وغيره كلهم فى النار
بس لو حاولنا نشغل مخنا شويه هنعرف ايه الصح وايه الحق لان كل حاجه واضحه من ايام سيدنا ابراهيم بس محتاجه شويه تفكير وتشغيل للعقل الى خلاص قرب ينقرض من قله مابنستخدمه
ولان الدين منطقه حساسه عندنا كلنا بيبقى صعب حتى الكلام فيه ف بيكون سهل على ناس كتير انهم يحملو السلاح ويقضو على كل من لايصدقهم وليس من لايقطنع بهم
معظمهم ومشاء الله يعنى فى مصر حدث ولا حرج ملين الدنيا
بيتكلمو بمنطق "هو كده هو ده الصح " طب انتا حضرتك يعنى حاولت شويه تقنعنى ده صح ليه !!
اشمعنا ده ال صح والباقى غلط !! .. هيرد : عشان هو كده ومتسئلش ده ربنا قال كده الرسول قال كده .. طب ياعم مش يمكن انتا غلطان مثلا او فهمت غلط ولا حاجه .. يقول لا ماهى واضحه اهى ..
فى اى حاجه بقا بيتبعو نفس النهج دين سياسه حياه كـــــــــــل حاجه
وطبيعى لما حد بيجى يغلطك ويقولك لاء حرام ازاى ده الرسول قال كده ويبرء بعنيه كده ..انا شخصيا بخاف ومبرضاش اغوص معاهم فى حوارات تخص الدين
____________
ولو حاولنا نبص على ال بيتسترو ب عبائه الدين فى مصر او فى كل مكان عموما..
وخصوصا حديث الساعه عن الناس ال كانت مع مرسى فى الصاله المغطاه والمهزله ال خصلت من ابشع الكلام وافظعه
وطبعا الراعى الراسمى بتاعهم مرسى بيه قاعد عادى مبسوط ب الهوا فيه
لحد مابانت اول بشاير الشحن للناس ولما قتلو الراجل هو و3 كمان وحرقه البيت
سؤال واحد بس .. مين ال اداك الحق !!
ده لو كان واحد جايبلو صنمين وبيعبدهم فى بيته انتا كامسلم مش من حقكك انك تضربه ولا تهينو حتى .. مش تقتله !!
لان ده واحد لارفع عليك سلاح ولااذاء فى حاجه راجل قافل عليه باب شقته ميخصكش ايه الى بيحصل ورا الباب ده مش شغل الى خلفوك
ده يرضى ربنا
طب بالنسبه للحقير ده !! وكمان بيجيب الحق على شيخ الازهر وسايب المحرضين والمجرمين الحقيقيين .. وبيدافع على ابو اسماعيل !! :\ تاجر السلاح هو ده كل الى ربنا قدره عليه
انا لا اعرف مين حسن شحاته دى اصلا ولا عمل ايه ولا قضيتى معاه انا قضيتى ان ده انسان ماشى على رجليه انتا ب اى حق تقتله !! ب اى حق !!
ده ربنا سبحانه وتعاله سيبه عايش .. تقوم انتا تقتله !!
والله لو فعلا زى مابتقول انه بيسب ومعرفش ايه انتا ممكن تروح ترفع قضيه ازدراء اديان عليه وتحبسه
وده مش صعب عليكو يعنى
لو اخدتها مش وجهه النظر التنيا عشان ابقى مش متحيزه
ف بيقوله انه واحد كان بيشتم الصحابه وبيسب السيده عائشه رضى الله عنها وارضاها وان دمه مهدور من 2002 ايام ما كان بيخطب وبيشتم الصحابه
بس السؤال بقا ..
هو مين ال دخل الشيعه تانى مصر !! مش هو نفسه البيسمع شتمتهم بودانه وساكت !!
ولما دخلهم هل هو ميعرفش انهم بيشتمو فى الصحابه !!
بس عموما مهما عمل مينفعش يتقتل وحتى لو هيتقتل يبقى مش ب البشاعه دى
وفى الاول والاخر انا لا انا فقيهه فى الدين ولا شيخه ولا بفتى بس ال اعرفه انه حتى لو
الراجل ده دمه مهدر والمفروض يتقتل ف اعتقد ان ولى الامر هو ال بيطبق الحدود يعنى من الاخر الشرطه قضاء تحقيق نيابه مش اروح اقتله ب ايدى ..
ومتزعلوش بقا لما يتقال عليكو انكو ارهابين ومتخلفين ولما تنفرو الناس من الاسلام .
ليست هناك تعليقات:
إرسال تعليق